Up Ma Jouk 
     Funny Scots Poems


UP MA JOUK
by Gregor Steele

Gutties, butties, headphones and jelly babies. But where are they? Find oot in Gregor Steele’s poem, sung by actor Lola Aluko.

 
  AUDIO - Up Ma Jouk


 

UP MA JOUK
by Gregor Steele
(tae the tune o My Favourite Things fae The Sound of Music)

Auld season tickets and new basebaw gutties,
White chocolate buttons and warm sausage butties,
A wee jaggie nettle that gied me a plook,
These are the things that Ah keep up ma jouk.

Green jelly babies, a postcaird fae Nairn,
A haiku, a toy coo Ah’ve had since a bairn,
Ma gran’s dug-eared copy o a Roald Dahl book,
These are the things that Ah keep up ma jouk.

Smairt wireless heidphones that didnae cost muckle,
A Mickey Moose watch wi a braw siller buckle,
Twa cans o ginger ma wee brither shook,
These are the things that Ah keep up ma jouk.

When the dug bites,
When the bee stings,
When Ah’m feelin sair,
Ah bring oot the things that Ah keep up ma jouk,
And Ah dinnae greet ony mair.